1. WEDHUS IRENG APA PUTIH ?
Kemplu sing agi kuliah
nang Fakultas Peternakan dina kuwe arep nganakna penelitian. Sing diteliti kuwe
peternakan wedhus. Dheweke mangkat meng ndesa ndilalah nang lapangan sing akeh
sukete, dheweke weruh wong agi angon wedhus. “Wah ana wong agi angon wedhus
lumayan kena nggo tambah-tambah data” batine Kemplu.
Kemplu terus medeki
wong angon mau, mbanjur takon, “ Mas, inyong melu takon ya,” Kemplu mulai
ngobrol. ”Ya olih, arep takon apa?” wong sing angon sing duwe jeneng Daplun
semaur.
Kemplu terus ngenalna
awake dhewek, mahasiswa sing agi penelitian, sing diterusna karo pitakonan
ngumpulna data. “Wedhuse mas Daplun sehat-sehat ya, mangane apa sih?” Kemplu
mulai takon. “Sing endi ndhisit ... sing ireng apa sing putih?“ Daplun ngomong.
“Anu sing ireng sit ya kena,” Kemplu semaur. “Nek sing ireng mangane suket nang
lapangan kae,” Daplun njelasna. “Ohh... lah nek sing putih?” Kemplu takon
maning.” Sing putih ya padha baen,“ Daplun semaur maning.
“Wedhuse
angger manak, ngasi pira anake?” Kemplu aweh pitakon liyane. “Sing endi ndhisit
...? sing ireng apa sing putih” Daplun balik takon. “Mmmm sing ireng sit ya
kena,” Kemplu ngomong. “Nek sing ireng angger manak ngasi lima,” Daplun semaur.
“Lah nek sing putih?” Kemplu takon maning. “Sing putih ya padha baen,” Daplun
semaur maning.
Krungu
kaya kuwe Kemplu mulai mandan kesuh. “Wedhuse sih ngasilna susu ora?” Kemplu
takon. “Sing endi ndhisit ...? sing ireng apa sing putih” Daplun balik takon. “Sing
putih sit bae,” Kemplu sing wis mulai jengkel ngomonge madan seru. “Nek sing
putih akeh, susune bisa ngasi rong liter ben dinane,” Daplun semaur . “Lah nek
sing ireng?” Kemplu takon maning. “Sing ireng ya padha baen,” Daplun semaur
maning.
“Mas-se
jan-jane anu kepriwe sih, aben ditakoni ndedekan ngomong sing putih sit apa
sing ireng, nek ujung-ujunge jawabe padha baen?” Kemplu takone wis mulai kesuh.
“Aja kesuh ya Mas, soale kaya kiye. Sing ireng kuwe sing nduwe inyong,”. “Oh kaya
kuwe ya Mas, ngapurane inyong miki emosi, lah nek sing putih sih?” Kemplu takon.
“Sing putih ya pada baen,” Daplun semaur kaya ora krasa salah.(*)
